Alle Minschen sind Brauders

Ett was Middagestöit. Eck kume iut`n Rathius riut un seihe twei lüttje Kinners, beide sau ümme de föiw Jahre eold, de teheope upp`n Trottear spielt. Dat eine hett en Ruller un foiert damie jümmer wier giegen de Beine von den annern. De beiden bruiet seck, un ett kümmt taun greoten Geschrichte, tau Wiut un Weihdage, eok in`r lüttjen Kinnersiele. Dat lüttje Kind ahne Ruller versöcht, den annern den Ruller wegtenühmen, un dat passöiert eok. De iehemalige Besitter von den Ruller geiht tau twei swarthaarige Mannsluie, de en Stücke wöier hen de Straten fäiget un den Ströit mie aneseihn harren. Ett hannelt seck ümme twei Türken, kurdischeTürken iut de Osttürkei, de in Duitschland ümme Asyl nahesocht hebbet. Se kürt wennig duitsch. Von städteschen Biuhowwe sind se forr gemeinnüttige Arbeit inesettet wurn.

Dat lüttje Kind ahne Ruller geiht upp einen von den Mannsluien tau un seggt: „ Onkel, Björn nimmt mir immer den Roller weg! Kannste Björn mal ausschimpfen?“ 

De Türke maket teierst en Gesichte, ass wenn ühne de Hoihner upp`n Appelkauken sittet, fatet seck, geiht dal in de Knei un seggt tau den lüttjen Klacks von Minsche: „Du, gutt, gutt gutt, gutt!“ un klappet ne föin sachte upp de Schulder. De Lüttje nickeköppet, smitt seck in de Bost, geiht stolt tau söinen föindsieligen Giegenuber un schröit: „Gib den Roller her!“

De lett den Ruller upp de Iere quacken, un dahen geiht hei mie natten Eogen vorr Wiut. Eok dat Enne von düsse Begiewenheit hebbet de beiden Iutlänners mie aneseihn, un de eine seggt tau den annern: „Bütün insanlar kardeslerdir!“ Dat hett: Alle Minschen sind Brauders!

(Erklärung: teheope=zusammen, gemeinsam, bruiet seck= ärgern sich, Weihdage=Schmerzen, Mannsluie=Männer, nickeköppet=nickt mit dem Kopf, upp de Iere quacken=auf die Erde fallen)

von Werner Sührig